Audi Q7 Euro NCAP тәуелсіз қауіпсіздік сынағының қорытындысы бойынша ең жоғары бес жұлдызды рейтингке ие болып, Post-Crash Safety — жол-көлік оқиғасынан кейінгі қауіпсіздік санатында 100% нәтижеге қол жеткізген алғашқы сериялық автомобиль атанды. Бұл жетістік Audi брендінің адам қауіпсіздігін соқтығысқа дейін, соқтығыс кезінде және одан кейін қамтамасыз етуге бағытталған кешенді ұстанымын айқындайды.
Автомобиль қауіпсіздігі тек жол-көлік оқиғасының алдын алу немесе соқтығыс сәтінде жолаушыларды қорғау мүмкіндігімен шектелмейді. Оқиғадан кейін көмектің уақтылы көрсетілуін қамтамасыз ететін технологиялардың да маңызы зор. Euro NCAP тәуелсіз бағалау бағдарламасындағы Post-Crash Safety санаты дәл осы аспектілерді қамтиды.
Үшінші буындағы Audi Q7 аталған санатта ең жоғары нәтижеге қол жеткізіп, құтқару қызметтеріне қажетті ақпарат беру, соқтығыстан кейінгі қолдау және автомобильден қауіпсіз шығу жағдайларын қамтамасыз ету көрсеткіштері бойынша максималды бағалар алды.
Соқтығыстан кейін де қорғауды жалғастыратын технологиялар
Audi Q7 кешенді қауіпсіздік жүйесінің маңызды элементтерінің бірі — Audi connect emergency call функциясы. Ауыр жол-көлік оқиғасы болған жағдайда жүйе автоматты түрде шұғыл көмек шақыруды іске қосып, автомобиль, оқиғаның сипаты және оның орналасқан жері туралы қажетті мәліметтерді жібере алады. Қосымша ақпарат жедел қызметтердің әрекетін тиімді ұйымдастыруға ықпал етеді.
Сондай-ақ multicollision brake — соқтығыстан кейін автоматты тежеу жүйесі маңызды рөл атқарады. Соққы датчиктерінен ақпарат алғаннан кейін жүйе автомобильді толық тоқтағанға дейін тежеп, тұрақ тежегішін іске қосып және авариялық жарық сигналдарын қоса алады. Бұл қайталама соқтығыс қаупін азайтуға көмектеседі.
Құтқару қызметтерінің жұмыс жағдайларына да ерекше назар аударылған. Автомобиль конструкциясы мен технологиялық шешімдері апаттан кейін есіктердің ашылуын, төмен кернеулі электрмен жабдықтау жүйесі істен шыққан жағдайда қажетті механизмдердің жұмысын және қауіпсіздік белдіктерінің құлыптарына қолжетімділікті ескереді.
Құтқарушыларға арналған арнайы ақпараттық материалдар — автомобильдің техникалық ерекшеліктері көрсетілген сызбалар мен нұсқаулықтар — қосымша қолдау көрсетеді. Олар оқиға орнындағы жағдайды жедел бағалауға және құтқару шараларын тиімді жоспарлауға мүмкіндік береді.
Қауіпсіздік — Audi прогресс философиясының ажырамас бөлігі
Audi үшін қауіпсіздік — автомобильдің жеке бір сипаттамасы ғана емес, брендтің инженерлік философиясының маңызды құрамдас бөлігі. Бұл ұстаным жол-көлік оқиғаларының алдын алуды, соқтығыс кезіндегі қорғанысты және оқиғадан кейін тиімді көмек көрсетуге жағдай жасауды қамтиды.
Кең салонды, бес, алты немесе жеті орындық конфигурацияларды, жайлылықты және заманауи қауіпсіздік жүйелерін үйлестіре отырып, Audi Q7 премиум SUV сегментінде осы қағидатты жүзеге асырады.
Euro NCAP сынағындағы бес жұлдыз және Post-Crash Safety санатындағы 100% нәтиже Audi брендінің адам қауіпсіздігін басты құндылық ретінде қарастыратын технологияларды дамытуға деген ұмтылысын көрсетеді.
